الاتحاد برس :

كوميديا ساخرة.. 

فتحي بن لزرق

قياديان أحدهما من الحكومة الشرعية والأخر من المجلس الانتقالي يجلسان الى جوار بعض بديوان كبير لتعاطي القات.. 

المكان: عدن

الزمان اواخر العام  2019.

القيادي الشرعي يستوي جالسا ويرمق صديقه الانتقالي بنظرة مطولة، يمد يده الى كيس قات افترشت اوراقه امامه ينتزع احداها ويمسحها برفق ثم يبادر ضيفه بلغة حازمة.. 

-أسمعني؟؟

-ايوه معك. 

-انت عارف ان كل شعارات الجنوب قادم وباننفصل ونريد نستقل شعارات كاذبة تضحكوا بها على المساكين وان كل الهدف من كل هذا انكم تشاركونا الكعكة ويكون لكم نصيب.. 

-طيب انت اسمعني كمان.. 

-ايش تفضل

-انت عارف كمان ان شعارات قادمون ياصنعاء واستعادة الدولة شعارات كذابة وانكم سرقتم الدولة سنين ولاتحقق شيء من هذه الشعارات.. 

-معك حق والله.. 

-وانت معك حق والله في الاولى..  طيب ايش الحل؟ 

- بعطيك الحل.. 

-هات 

-بندخل شراكة في حكومة واحدة، لكم جزء ولنا جزء وانتم اسرقوا من ناحيتكم ونحن بنسرق من ناحيتنا.. 

-ايوه ممتاز

-وانتم خلوكم زي ما انتم على نفس الشعارات جنوب انفصال تحرير استغلال.. 

-ايوه بس انت عارف مابيتحقق منها شيء 

-صبرك لا تتسرع على رزقك.. 

-ايوه وانتم ايش بتعملوا؟

-نحن كمان بنجلس على نفس الشعارات قادمون ياصنعاء ياويلك ياحوسي يابوسي وايضاً مابيتحقق منها شيء.. 

-الله عليك وعلى افكارك.. 

-باقي حاجة؟

-ايش هي؟ 

-المطبلين؟ 

-المطبلين حقكم زيما هم يستمروا يحملونا فشلكم في التحرير والاستقفال والمطبلين حقنا بيحملوكم فشلنا في تحرير صنعاء واستعادة الدولة.. 

-والشعب؟ 

-شعب مين ياعم؟ الشعب نص معنا ونص معكم،  والباقي مطبل هنا وهناك .. 

-الله عليك يا اخي ماتقول كذا من زمان بدل الصراع والحرب.. 

-مش مشكلة ملحوقة ياعم، خلينا نشوف شغلنا.. 

-توكلنا على الله.. بس هات رأسك ابوسها.. 

-ياعم مافي داعي والله.. 

-لا والله حرام طلاق في التحرير والاستقلال ابوس راسك.. 

المشهد الثاني.. 

يونيو 2023

نفس الديوان ونفس الأشخاص... 

قيادي الشرعية يلتفت لقيادي الانتقالي ويهمس في أذنه.. 

-هاه كيف اللعب؟؟

-حلاوة وربي حلاوة.. الشعب هذا لازم نحافظ عليه وعليكم انتم كمان والله اننا ظلمناكم... 

هات راسك ابوسها.. 

يسدل الستار.. 

والكهرباء طافي...

فتحي بن لزرق